De colomn van Gijs op Radio LIN FM

Mit dees daag sjteit neemes boete sjpel

Laot ich beginne uch loestereers te vertille det het mich ein grote eer en ein genoege is om oetgeneudigd te waere om deil oet te moge make van dees noe al legendarische radio-oetzending in crisistied. Mocht Jan Sjure euver 40 jaor ein nuuj book sjrieve euver os prachtige maasdörpke in dees penibele maondje, den gaon ich der van oet det dees radio-oetzending dao prominent deil van oetmaakt.

Want ein crisis, det is toch waal waat os dörp al waekelang in zien greep hult. Al drie waeke zitte veer als brave burgers binne en hubbe de moer vanne hoeskamer al drie keer in ein anger kleur geteks. Toeswerke noeme ze det. Sociale contacten zeen beperkt en sjpele zich mit name online aaf oet ein terechte vrees veur besmetting. Marja en Ruud kieke al waeke taege laeg barkrukken aan; misjien kinne ze Stefan ins vraoge wiej dao mit om te gaon.

Radio maken in crisistied; det is waat hiej gebeurt. Waat Radio-Oranje ooit woor veur oos groot-aojers, is dees oetzending veur de nuuj generatie. Euver 40 jaor zulle os kleinkinjer vroage; ‘Opa, weet deetj geer in dae crisis?’ En den kinne veer heldhaftig en mit naate uigskes vertellen: oppe bank ligge en FaceBook radio loestere jong.

Maar mit zo’n opmerking doot ich natuurlijk eine haup luuj gein eer aan. Linner vaders en mooders die de kinjer toes lesgaeve en motte entertaine. Gelukkig is auch in Lin de baerejacht van start kinne gaon, zodat de jeugd onger het motto ‘Vang dich eine baer’ nog verantwoord de straot op kin.

En waat te dinke van alle luuj die op dit moment 24 oers deenste dreie in de zorg om klaor te staon veur de miense wo het op dit moment get minder mit geit. Det zeen de toppers die de Janse Baggebend ‘Nuuj Helde’ zow noemen. Dao kin allein ein deepe buiging veur gemaakt waere. En heur werk is nog lang neet kloar.

Ein vergelieking van deze corona-crisis mit oorlogstied is nog neet ins zo heel vreamdj. Ich höb oet menig, meer “bejaarde” hook vernaome det sinds den oorlog het dagelijks laeve in oos heerlijk relaxte Nederlandj neet eerder zo aan benj is gelag. Natuurlijk hölt die vergelieking auch waal weer sjnel op, omdet alle maotregele die aan os zeen opgelag ein hoger doel deene; oze gezondjheid. Dao haje oos Oosterburen destieds weer get minder auch veur.

Maar toch. Juus in ein jaor det veer os 75-jaorige vrijheid viere, zeen veer es Nederlenjers, als Limburgers, als Linneneren, meer beperkt in oos doon en laote den ooit. Het bringt onzekerheid en onrust mit zich mit. Vaste waardes in oos Linner gemeinsjap staon opins op losse schroeven. Kumt de Sjötterie nog waal het oad papier ophaole? Kumt de Hermenie nog waal mit Potgrondj langs de deur? Kumt de Zank nog waal mit Paoseier door de sjtraot?

Ich kin uch gerust stelle; de sjotterie kumt woonsdig geweun langs, ich hub de Hermenie gister nog mit zek aerd zeen sjleipe en de paoseier, dao motte ver os maar ff get angers veur verzinne. Want net als patiënten kinse die neet ein jaor laote ligge, wao Hans.

En als ver het den toch euver vaste waardes hubbe; waat ich perseunlijk erg jaomer vonj, is det oze eige Prins Tim den eerste tot twee keer toe zien groote optocht in het water haet zeen valle. Sjpeelde in februari hem het waer parte, in maart hingtj der get angers in de loch. Zo’n optocht, woveur zoveul Linner luuj zich hubbe ingespanne om der same get sjoons van te make, is zeker in dees tieje een sjterk bindjmiddel. Maar natuurlijk neet als det ten koste geit van oos gezondjheid.

Het virus en alle maotregelen bringt veul kantje van de mienselijke aard aan het leeg. Good en sjlech. In gans het landj waerde de supermert geplunderd door ein waar leger aan Hamstereers. Met name van de onverklaarbare en massale behoefte aan wc papier kreeg ich danig de sjiet. Euveral op het internet versjene foto’s van laege winkelsjaape. De luuj oet Lin zulle der neet van wakker hubbe gelaege; biej oze Linders zeen ver gewind aan laeg sjaape.

Waat steit os de komende waeke en moandje nog te wachte? Ondanks det het sociale laeve op ein leeg pitje is gezat, bringt de crisis miense samen. Ich hub al versjillende prachtige initatieven gezeen om der same de sjouwers onger te zitte en hub zelfs op de sociale media eine heuse online-vriedigmiddig borrel gezeen. Heel good praeses, heel good!
Juus mit dees daag motte ver ein bietje baeter op elkaar letten. Angerhalve maeter is nog altied dicht genog om elkaar eine gooje daag te winse en te vraoge wiej het toes geit. Juus deze tied in aafzondering is ein moment om meer den ins aan angere te dinke.
En in det opzicht kinne veer bliej zeen det Prins Tim os nog altied veurgeit in deze vastetied. Unne prins in crisistied mit eine profetische sjpreuk: “Mit dees daag, sjteit neemes boete sjpel.” Laote ver die wijsheid als oetgangspunt naeme veur de meneer wo op ver de komende waeke en maondje mit elkaar omgaon.
Ich wins uch allemaol veul gezondjheid en sterkte toe, braaf zeen en ich haop toch auch weer sjnel mit uch samen ein lekker glaeske beer te kinne drinke.

Gijs